Hvers eiga hinar að gjalda?

Þetta hlýtur að hafa verið mjög leiðinlegt fyrir hinar í sveitinni að hafa þurft að skil verðlaunum sínum. Því auðvitað er ekki við þær að sakast heldur Marion Jones og vont að þurfa að refsa öllum fyrir brot hennar. En svona eru hópíþróttirnar, þar standa allir og falla með mistökum liðsfélaganna, því miður í sumum tilfellum.

Bandaríkin svipt verðlaunum vegna Marion Jones

Bið ekki um mikið!

Hvað hefur fólk með alla þessa peninga að gera og hvað ætli þeir geri við alla þessa peninga? Þeim endist auðvitað ekki ævin til þess að eyða þessu öllu. Ætli þeir gefi með sér því ef svo er bíð ég mig fram í að hjálpa þeim að eyða þó að það væri ekki nema 50 millur. Sjáið þið bara, ég er ekki að biðja um mikið! 

Beckham er launahæstur á ný

Hleypur og hleypur og hleypur!

Ég horfði auðvitað á mína menn spila úti á Ítalíu í gærkveldi og fór að spá í svolitlu sem ég hef áður velt fyrir mér. Í leikjum í meistaradeildinni er alltaf sýnt þegar leikmönnum er skipt útaf, eða við önnur tækifæri, hve mikið þeir hafi hlaupið meðan á leiknum stóð. Sýnd er nærmynd af móðum og másandi leikmönnum þegar þeir yfirgefa völlinn og neðst á skjánum stendur t.d. 7896 m. Þetta er ekki mælt í kílómetrum heldur metrum. Ætli það sé vegna þess að vegalengdin virkar lengri ef hún er í þúsundum metra heldur en í kílómetrum? Og svo að öðru, hvernig reikna þeir þetta út? Ég er nú ekki tæknivæddasta manneskja sem ég þekki og auglýsi hér með eftir einhverjum sem veit hvernig þetta er gert.

Ætli ég megi fá lánaðan hattinn....

Ég hef lengi dást að í laumi hattinum sem Petr Cech hefur spilað með síðan hann lenti í samstuði við annan leikmann og höfuðkúpubrotnaði. Leikmenn hafa löngum skartað hinu ýmsu sérútbúnu gleraugum, andlistgrímum og mörgu fleiru í hinum ýmsu íþróttum en ekkert af þessu hefur heillað mig eins og hatturinn góði!! Ekki sæji ég sjálfa mig með einhverja sérútbúna grímu á andlitinu en hattinn hans Cech myndi ég taka mig vel út með

Cech ekki með Chelsea næstu vikurnar

Hvenær skorar (mark)maður mark?

Ekki þekkji ég margar konur sem horfa á fótbolta í sjónvarpi, nema þá mömmu og eina vinkonu mína, og horfi því á enska boltann með manninum mínum þegar færi gefst. Liðið mitt í enska boltanum er Liverpool og horfði ég á leik liðsins gegn Bolton um helgina. Mínir menn fóru á kostum og unnu leikinn en það er eitt atvik sem situr ennþá í mér og það er ,,sjálfsmark,, Jussi Jaaskelainen, markvarðar Bolton. Mig langar að vita það hver það er sem ákveður það hvenær markmenn skora sjálfsmark og hvenær ekki. Starf markvarðarins, eins og nafnið felur í sér, er það að verja markið gegn þeim skotum sem á það koma og til þess verða þeir að nota líkama sinn á einhvern hátt. Eins klaufalegt og markið var sem að Gerrard ,,skoraði,, þá finnst mér ekki hægt að dæma það sem sjálfsmark Jaaskelainen. Hann var aðeins að gera það sem markmenn eiga að gera en mistókst svona hrapalega, boltinn hrekkur einfaldlega af honum og inn í markið. Spurning mín er einfaldlega sú: hvernig er það ákveðið hvort að um sjálfsmark markvarðar er að ræða eða mannsins sem skítur boltanum, er það bara gert þegar um eins klaufalegt dæmi er að ræða eins og hjá Jaaskelainen? Ég hef velt þessu mikið fyrir mér og komst að þeirri niðurstöðu að ef ég væri sú manneskja sem myndi ráða þessu þá væru ekki dæmd sjálfsmörk á markmenn nema að þeir einfaldlega spörkuðu boltanum í sitt eigið mark. 

(og þið karlmenn sem eru að lesa þetta, ég er ekki einhver kona sem tók upp á því á gamals aldri að fara að horfaá fótbolta heldur hef ég stundað og horft á íþróttir síðan ég var krakki, ég veit meira að segja hvað rangstæða er   ) 

Benítez: Frábær frammistaða